Reshjet e dendura të shiut kanë shfaqur problematikat e para në disa qarqe të vendit, duke shkaktuar përmbytje në disa lagje dhe rënie gurësh në disa prej akseve rrugore.

Në këtë kuadër, Policia e Shtetit iu ka bërë thirrje për kujdes qytetarëve, duke iu bërë me dije gjithashtu vështirësitë që janë shfaqur në qarkullimin e mjeteve në disa zona të vendit.

Policia sqaron se në rrugën interurbane që lidh Tiranën me Durrësin, në zonën pranë karburantit në hyrje të Durrësit, ka prezencë të lartë të ujit në të dyja anët e lëvizjes, gjë që e bën të pamundur qarkullimin normal të mjeteve.

Policia bëri me dije se me qëllim shmangien e trafikut dhe aksidenteve, do të devijohet lëvizja si më poshtë: automjetet që vijnë nga jugu në drejtim të Tiranës, të qarkullojnë nga Rruga e Plepave për në Ndroq dhe nga rruga “Rrogozhinë–Elbasan–Tiranë”.

Për në Durrës, kalimi do të bëhet nga rruga e universitetit, në drejtim të Spitallës dhe në rrugën “Tiranë–Elbasan–Rrogozhinë”.

“Policia apelon për drejtuesit e mjeteve që të shmangin lëvizjet e panevojshme, të tregojnë kujdes maksimal gjatë lëvizjes, të ndjekin udhëzimet e punonjësve të Policisë dhe të zbatojnë sinjalistikën rrugore.

Shërbimet e Policisë Rrugore dhe Patrullat e Përgjithshme po marrin masa për lehtësimin e qarkullimit të mjeteve dhe për të ndihmuar drejtuesit e mjeteve”, thuhet në njoftim.